2Cor 7 | KMG | STEP | Âgo bureŋ, wiac iŋucnere biŋe qanârekicnere wiac mamakâcnezi maŋ sahac-nâŋec hegâpâreekac i šure ɋaɋackenšepeneŋ. Erâ Anutu araŋ bacnehuc maŋɋaɋac jaha junšepeneŋ.

2 Corinthians 7

Paulo e Korinti ŋic maŋjeŋic mi sakarecneniŋte jazawec

1 Âgo bureŋ, wiac iŋucnere biŋe qanârekicnere wiac mamakâcnezi maŋ sahac-nâŋec hegâpâreekac i šure ɋaɋackenšepeneŋ. Erâ Anutu araŋ bacnehuc maŋɋaɋac jaha junšepeneŋ. 2 Ŋoŋe maŋŋeŋic mi sakare-nârenšepieŋ. Nâŋe ŋoŋerao wiac hehesic mi embeŋ, me wiac-ŋeŋic ima mi qambeŋ, me wiac-ŋeŋic moc kâŋgâc mi rombeŋ. 3 No dâŋ i musâqorec-ŋopahuc mi mukopac. No miŋecne mac ŋazapac, maŋnâŋeczi šâfic-ŋopaŋgopeneŋ, i ŋoŋehec mâmâc hâmonaŋte me junaŋte. 4 Maŋnanezi ŋoŋerao siŋkeha wemo afecne muafec-ŋopakopac, no bunane boc bâmiriŋkekicne, šâic busâqocko šeri kâcɋene fua-narekac.

Paulo e Korinti haeonec biŋe manarâ bune biaŋkewec

5 Makedonia mâreŋko ware fisirâ wemocko âke uruerâ junšapeŋ. Ʒira sahacte biŋe šika â maŋte biŋe hâhâwic, wiac izi fuarâ sisi hâhâŋ enâreha jumbeŋ. 6 Bebekâne bâmiriŋ-jopaekac Anutu eki hâcne ine nâŋere bâbâmiriŋte Tito ecneme risiewec. 7 Erâ risiewec irec sawa mâcne, ŋoŋe bubiaŋ dâŋ âzâcnembiŋ, i bafisime manarâ bunâŋec uruewec. Erâ no woricnuhuc jueŋgopieŋ â ki busâqochec jueŋgopieŋ â nore erâ gie-ŋeŋic dopeckehuc šoɋac eeŋgopieŋ, i nâzâme bubiaŋ fekicne manapo.

Bušâic ɋaɋacne manarâ biaŋkezo

8 No mârâc papia moc qâreŋke-ŋarehuc maŋšâic bâfua-ŋarepo, irec bunane mi sâqorekac. Qâreŋkepo ira jâmbomac bunane sâqorewec. Ʒi ine manakopac, i dameŋ bembeŋne sawa maŋšâic bâfua-ŋarewec. 9 Eme ši bubiaŋ manakopac, ine bušâic manambiŋ irec mâcne, bušâiczi ŋoŋerao maŋ bâbârisie bâfuawec, irec bunane biaŋkekac. Anutu mamana-ticnere sâcko bušâic ɋaɋacne manambiŋte dâŋnâŋeczi mi bâsâqorec-ŋopawec. 10 Bušâic ɋaɋacne izi maŋ bâbârisie bâfuame ŋiczi biaŋkezo, eme bušâic iŋucne bâfuaocmuzi šâhec irec mi maname sâqoreocmu. Á bušâic gâpâcne, ŋic mamanare sâcko fuaekac, izi ine maŋmutuc bâfuame sipirickezo. 11 Honeniŋ me, bušâic ɋaɋacnezi ŋoŋerao fârine wemo afecne bâfuawec: Fâro, fuŋne babataniŋ, sâqocne bâbâsue, hâhâwic, mu hejâpec, šoɋac, bâbâtiŋ, wiac iŋuc hâcne bâfuawec. Eme sâqocnere hehesoŋ â ŋeŋezic ŋoŋerao mi fokac, irec fuŋne taniŋkewec. 12 Mârâc papia qâreŋke-ŋarepo, i ŋic sâqocne bawec ere erâ mâcne, me sâqocne bajarewec jaŋere erâ wâc mâcne, dâŋ ŋazapene Anuture maio micrereŋ-ŋeŋicte fuŋne taniŋkeocte irec qâreŋke-ŋarepo. Eme ŋoŋe iŋuc hâcne ehuc bunâŋec bâmiriŋkembiŋ.

Korinti ŋic jaŋe Tito bubiaŋ qacnembiŋ

13 Erâ bunâŋec bâmiriŋkembiŋ sawa mâcne, ŋoŋe Tito bubiaŋ qacnepie risieme nâŋe wemo afecne mana biaŋ embeŋ. 14 No mârâc jaha muafec-ŋopahuc Tito âzâcnepo, dâŋ i burec mi ewec. Ŋoŋe dâŋ ŋazape fârinehec efârewec, iŋuc jaha Tito ŋoŋere mumumbiaŋ dâŋ âzâcnepo i wâc fârinehec jaha ewec. 15 Tito ŋoŋerao fâme araŋ bacnehuc micne reŋkembiŋ, e irec manasuhuc maŋne ŋoŋere boc ecneekac. 16 No ŋoŋere erâ maŋbahac tâmiric sâcne jupemu, irec bunane biaŋkekac.